ئەمڕۆ یەكشەممە 10/11/2019 لە سەلاحەددین سەرۆك مەسعود بارزانی پێشوازی لە ئاڵبێرتۆ مارتین ئۆرتێگا باڵیۆزی ڤاتیكان لە عێراق كرد.
لە دیدارەكەدا باڵیۆزی ڤاتیكان لە عێراق سوپاسی رۆڵی سەرۆك بارزانی و هێزی پێشمەرگەی كوردستانی كرد لە تێكشكاندنی تیرۆریستانی داعش و رایگەیاند، ئەوەی پێشمەرگە ئەنجامی دا كارێك بوو بۆ هەموو مرۆڤایەتی. هەروەها پێزانینشی هەبوو بۆ خەڵك و حكوومەتی هەرێمی كوردستان كە لە رۆژانی تەنگانەدا ئاوارە و پێكهاتە ئایینی و نەتەوەییەكانیان پاراست و دەرگەیان بۆ كردنەوە.
لە بەشێكی تری كۆبوونەوەكەدا بارودۆخی سیاسی و دوا پێشهاتەكان و ناڕەزایەتی و خۆپێشاندانی خەڵك لە بەغدا و پارێزگاكانی باشووری عێراق تاوتوێ كرا و جەخت لە رەوایەتیی داواكاریی هاووڵاتیان و خۆپێشاندانی ئاشتیانە كرایەوە و هەردوولا لەسەر ئەوە هاوڕابوون كە توندوتیژی جا لە هەر لایەك بێت كێشەكانی عێراق قووڵتر دەكاتەوە.
پەرەپێدانی پەیوەندییەكانی نێوان هەرێمی كوردستان و ڤاتیكان تەوەرێكی تری ئەو كۆبوونەوەیە بوو.