شەڕ (محەمەد)ی سوتاند

ئاریان فەرەج

شەڕ جیا لە كوشت و كوشتار، خوێن و فرمێسك، بەهەدەرچوونی رۆح و پێشێلبوونی كەرامەت و ماف و ئادەمییەتی مرۆڤ، ئاوارەیی و ماڵوێرانی، زەرەر و زیانی بێ سنور، مەرگەسات و ئازار و خەم و كۆڤان، هیچ بەرهەمێكی دیكەی نەبووە و نییە. شەڕ حیكمەت و عەقڵ و هۆش و دەرفەتەكانی لێكگەیشتن و بە ئاشتی چارەسەربوونی گرفتەكان لەبەین دەبات. رقەبەرایەتی و كەراهیەت و تۆوی توڕەیی لە نێو گەلاندا دەچێنێ و ئایندەی پێكەوەژیان و چەكەرەكانی تەبایی لە رەگەوە هەڵدەكێشێ. شەڕ ئێستا لە خوێن و ئاگر هەڵدەكێشێ و ئایندەش دەخنكێنێ.

شەڕ پشتكردنە عەقڵ و حیكمەت و فكر و پەرۆشییە، تەسلیمبوونە بە كەمدەستیی و بێ توانایی عەقڵ و سیاسەت و تەفكیر و تەدبیر بۆ چارەی گرفت و ناكۆكییەكان. شەڕ بەدیلێكی بێهودە و عەبەسی و نائینسانییە كە لە كۆتاییدا جگە لە ئاڵۆزكردنی زیاتری كێشەكان، ئاستەنگ كردنی رێگەچارەكان، قوڵتركردنەوەی زیاتر و زیاتری ناكۆكییەكان، هەرگیز نەیتوانیوە و ناتوانێ چارەسەر بەدی بێنێ و كۆتایی بە ناكۆكی بێنێ.

تێگەیشتنی پێشوەختە لە بێهودەیی و مەترسی و زیانەكانی شەڕ ئەوەندە گران نییە، بەرلەوەی شەڕ لە رۆژئاوای كوردستان هەڵگیرسێ، مەعلوم بوو خەڵكی سڤیل و لاشەڕ و بەلەنگاز دەبنە قوربانی، مەعلوم بوو دیمەنی كوژران و سوتان و گریە و ناڵە و هاواری مناڵانی پەپولەئاسا و پیر و پەككەوتەی بێ دەرەتان و بارگران دەبینین. جەرگ سوتانی دایك و باوكان و هاوار و فیغانی جەنگ زەدە و لێقەوماوان دەبینین.

ئایا پێویست بوو گریە و ناڵە و هاواری دڵهەژێن و ویژدان تەزێنی (محەمەدی هەڵقرچاوی سوتێنراو) ببیستین تا جیهانییان تێبگەن جەنگ و هێرش بۆسەر میللەتێكی تەنیا و بێ پشتیوان چ مەرگەساتێكی لێ دەكەوێتەوە.

هاواری محەمەد كە دڵی بەرد دەكات بە ئاو، برینەكانی ئاگری جەستەی محەمەد كە برینن لە دڵی كۆی بەشەریەت و هەر مرۆڤێكدا كە هێشتا لە مرۆڤایەتی دانەشۆردراوە، ئەنجامی چاوەڕوانكراوی ئەو جەنگەیە، ئەرێ ئەو ئەنجامە كام كێشە و گرفتی چارەسەر كرد و دەكات. كام ئاشتی بەدی هێناوە و بەدی دێنێ؟؟.
التسميات :

إرسال تعليق

[facebook]

MKRdezign

نموذج الاتصال

الاسم

بريد إلكتروني *

رسالة *

يتم التشغيل بواسطة Blogger.
Javascript DisablePlease Enable Javascript To See All Widget