كوردانی نیشتەجێی ئەرمینیا، بۆ ناڕەزایەتی دەربڕین لەدژی لەشكركێشی سوپای توركیاو میلیشیا چەكدارەكانی ئۆپۆزسیۆنی سوریا بۆسەر رۆژئاوای كوردستان، گردبوونەوە.
رۆژی 25ی ئەم مانگە، ژمارەیەكی زۆر لە خوێندكارانی كورد و كوردانی ئەرمینیا بەبەشداری ژمارەیەك لە ھاوڵاتیانی ئەرمەن، لە یەریڤانی پایتەختی ئەرمینیا و لەبەردەم نووسینگەی نەتەوەیەكگرتووەكان لەو ووڵاتە گردبوونەوە.
گردبوونەوەكە لەلایەن رێكخراوی دۆستایەتی كورد و ئەرمەن بە ھەماھەنگی لەگەڵ فیدراسیۆنی لاوانی ئەرمینیا رێكخرابوو، سەرەتا خۆپیشاندەران لە مەیدانی كۆماری لە ناوەراستی یەریڤان كۆبوونەوە و دواتر بەرەو نووسینگەی نەتەوەیەكگرتووەكان بەڕێكەوتن.
خۆپیشاندەران دوایان لە نەتەوەیەكگرتووەكان كرد كە ھاواری گەلی كورد بگەیەننە كۆمەڵگەی نێودەوڵەتی و بیانپارێزن، دواتر بەھەرسێ زمانی كوردی و ئینگلیزی و ئەرمەنی بەیاننامەی خۆپیشاندەران لەبەردەم میدیاكاندا خوێندرایەوە و پێشكەش بە بەرپرسانی نووسینگەی نەتەوەیەكگرتووەكان كرا.
